منانة وغوانتنامو وزيادة الأسعار

نور الدين العويديدي





فوجئ جحا حين فتح عينيه فجرا ببراد الشاي إلى جواره.. لم يصدق عينيه.. قرب أصابعه بحذر شديد من البراد ولمسه بطرف إصبعه ليتأكد أنه ساخن، وأنه ليس من بقايا سهرة الليلة الماضية.. ولم تمض دقائق معدودات حتى داهمته خالتي منانة بالفطور.. شعر جحا بسرور غامر، وأراد أن يقبل رأس منانة، امتنانا لها على خدمته.. وحين هم بتقبيلها صاحت العجوز بشيء من التمنع والدلال..



- ووه يا غلبة يا جحا بعد ها العمر تحب تبوسني يا راجل.. راك كبرت وما بقاش فيك شيء.



- جحا بغضب: راني مازلت صغير.. الحمدو لله يا ربي صحتي أقوى من ثور.



- منانة محاولة تهدئة غضبه ومغيرة الموضوع: ربي يطول في عمرك ويشد لي فيك يا جحجوح.. أما ما تقوليش يا راجل علاش الحكومة متقلقة على خاطر المحكمة متاح حقوق للسان متاع القوِرَّة ما حبتش تعطيها هذاك الولد سعيد، اللي ساكن في بلاد الطليان.. يا غلبة الطُفُل خرج مع الحراقة.. ويحبي يرجعوه لهالبلاد الكلبة.



- حجا: شكونو سعيد هذا.. آه تقصدي الإرهابي نسيم سعدي!.. ما سمعتيش القاضي متاعنا آش قال.. الراجل قال القرار متاع المحكمة الأوروبية لحقوق الإنسان غريب ويحيّر.. وأنو ما عندهومش معلومات صحيحة على حبوس تونس.. وكلامو صحيح مية في المية.



- منانة: لا عندو حق.. القوِرَّة ما يعرفوش الحبوسات متاعنا.. ما يعرفوش اللي دخل غادي بالزهر كان يخرج.. نسيت ولد مباركة أختي.. دخل صحيح كالعتروس ما خرج كان للقبر، وقالوا قتل روحه.. يا غلبة الولد هذاك يقتل روحه.. ما يقتلش ذبانة.



- جحا: ولد اختك راسو صحيح ما يكسروا كان الحجر.. والجماعة قاموا معاه بالواجب.



- منانة: أخطاك من ولد مباركة أختي.. آش رايك في التوانسة اللي عند الماريكان، في هذاك الحبس اللي يسموه كولوا وناموا..



- جحا ضاحكا: تقصدي حبس غوانتنامو هذاكا اللي في ززيرة كوبا..



- منانة: هيه هذاك الحبس.. الذراري اللي حابسينهم فيه قالوا نموتوا عند الماريكان ونروحوش لتونس يعذبونا ويقتلونا ويشّمتوا فينا..



- جحا: آش نعملولهم.. ما عندهومش حتى غرام م الروح الوطنية.. يقتلوهم الأمريكان أحسن.. أما خير ولد بلادك يضربك ويضرب عليك، ويقتلك ويقتل عليك، وإلا الأمريكاني.. على مراد الله ما عندهومش حتى شوية وطنية.



**************************



بعد مرور بعض الوقت بدا جحا ضاحكا مستبشرا وهو يقول:



- في بالك يا منانة اللي مش نولوا نبيعوا الهريسة للانقليز.. هذاك محمد الفايد يعطيه الصحة قال اللي هارودز متاعو اللي في لندرة باش يولي يبيع للانقليز الهريسة والدقلة التونسية والكسكسي.



- منانة: ووه يا غلبة.. والانقليز يقدروا ع الهريسة يا راجل.. توا شطرهم يموتوا والشطر لاخر يرقد في السبيطارات.



- جحا: آه والله عندك حق يا منانة.. تخاف يموتوا من حرارة الهريسة وبعد يتهمونا اللي هي مسمومة.. الله يستر أنا وليت خايف على سمعة بلادنا.. إذا مات واحد منهم توا يقولوا اللي التوانسة نعذبوا في المحابيس بالهريسة.



- منانة ضاحكة: نحسابك قاري وواري.. هذا كلام تقولا يا راجل.. المحابيس مساكين همّ يذوقوا الهريسة.. همّ يردوهم هريسة.. يهرسوهم بالعصي تهريس.. ويقلعوا لهم ظوافرهم بالكلاليب.. أنت خايف عليهم من الهريسة.. ما ثماش تونسي صحيح ما يحبش الهريسة.. حتى لو مات بيها.



**************************



صمت جحا ومنانة طويلا، وقد انشغلت المرأة أثناء ذلك الصمت بإطعام الدجاجات وحلب البقرة.. ثم عادت العجوز للحديث..



- ما تقوليش يا جحا وين هازينا.. يا خي سمعت بالزيادة في القاز وإلا لا.. ووه.. ووه.. لسعار ولت نار.



- جحا: وانت آش يهمك.. انت فاش تحتاجي البترول والبنزين.. تشوفي في الكرهبة متاعك مشطوحة قدام العشة.. تي عندك فتيلة ما تصرفيش عليها حق ليترا قاز في العام.. آش يهمك في الزيادة.



- منانة: يا غلبة يا راجل، وهم علاش يزيدوا في الاسعار.. كيلو الحوت ولى بعشرين دينار.. والله شاهية رطيل سردينة عندي توا سبعة شهور، وانت وين نقول لك جيبنا شوية حوت تقولي لسعار نار، وتوا تلوم فيَّ كي نتحدث ع الزيادات.



- جحا: هذاك المقرص هذاك المعجون.. اللي عجبو عجبو، واللي ما عجبوش يكسر قرنو.. خليهم يزيدوا في لسعار كي ما يحبوا، والسردينة ما ثماش.



- منانة باكية شاكية: أنا عارفاتك علاش.. على خاطر ما جبتش ليك أولاد.. تذل فيّ وحارمني م السردينة.. أما البوري والقاروس نسمع بيهم سمع.. هاك العام مباركة أختي ذوقتني شوية بوري.. وباقي والله شوية لا موتت م الغلبة والقهرة.



**************************



أحس جحا بحالة الحرمان التي تعاني منها خالتي منانة، فقام وقبل رأسها وأرضاها بكلمات طيبت خاطرها، وطلب من مراسل "آفاق تونسية" أن يتركهما لوحدهما قليلا في بيت الزوجية، فلم يجد المراسل بدا من إنهاء الحلقة.



(المصدر: مدونة "آفاق تونسية" لنور الدين العويديدي بتاريخ 3 مارس 2008)

الرابط: http://noureddine-2010.maktoobblog.com/

heeedi كتب:و ضرب الله مثلا قرية كانت آمنة مطمئنة يأتيها رزقها رغدا من كل مكان
فكفرت بأنعم الله فأذاقها الله لباس الجوع و الخوف بما كانوا يصنعون

زعمة الشعب ما يحمدش ربي ولا ولي الأمر يحب يستحوذ على كل شيئ وحدو هو و العصابة متاعو و الناس موش لاقية حتى الخبز و الماء؟؟!

heeedi كتب:و ضرب الله مثلا قرية كانت آمنة مطمئنة يأتيها رزقها رغدا من كل مكان
فكفرت بأنعم الله فأذاقها الله لباس الجوع و الخوف بما كانوا يصنعون

ما فهمتكش شتحب تقول عم هادي

وانتي يا قول الصوارم
شكون العصابة متاعو

البلاد بكلها عصابة شكون قعد ما سرقش

إلي هب ودب خذا بايو

قولوا حسبنا الله ونعم الوكيل
اللهم إنا نشكوا إليك ضعفنا وقلة حيلتنا

شبيك تقطع في شعرك يا كشاف

الدنيا مازالت بخير